Jimmy Gebert

“Jimmy” Gebert

Ein’ von uns’ Lihrers wier “Jimmy Gebert”. Bi em haren wi Geschichte un Gegenwartskunde. Ein Lihrer, tau denn’ man jedertied mit siene Sorgen un Nöte kamen künn. De Unnerricht bi em hett mi Spaß makt. Mihr noch as sien’ Unnerrichtsstunn is bi mi un bestimmt uk bi all mien sportbegeisterten Schaulfrünn’ wat anners hängen bläben: Ick seih Jimmy in Gedanken bloß ümmer in Turnhoos un Turnhemd up denn’ Sportplatz orrer up unsen Schaulhof mit allerhand Isen rümmerwirtschaften.

Entweder mit’n “Gewicht” (eine 12,5 - Kilo-Kugel mit’n Griff, dei de Form von eine Triangel hett), orrer mit’n “Stein” (ein Muerstein ut Isen von 15 Kilo), orrer mit’n “Hammer” (wie hei uk hüt noch von de Leichtathleten benutzt ward). Kort un gaut: Jimmy wier mit Liew un Seel “Rasenkraftsportler”. Noch hüt is hei stolz dorup, dat hei Anfang de föftiger Johren de ierste Sportler oewerhaupt wier, de einen DDR-Meistertitel na Niegenbramburg halt het (hemm Ji dat all wüßt ?). Oewrigens: Unse Chronik upmarksam läsen, denn entgeiht Juch sowat nich !

Jimmy wier’n Pundskierl un het uns so manchen Kniff im Training zeigt. Mi tau’m Biespill för dat Speerwerfen, worin ick besonners miene Stärken har un damals sogor denn’ Schaulrekord hööl. Üm mi nich tau blamiern, sech ick hier leiwer nich, wie wiet ick damals schmäten heff. Vergläken mit de hütigen Wieden wier dat dunn man bescheiden.




		“Jimmy” auf unserem Klassentreffen 1991




		“Jimmy” und “Schibé” 1956

Sien “Läbenswark” het Jimmy leider nich mihr beend’t: Johrelang het hei mit Schüpp, Hack un Bick an unsen Schaulhof arbeit’, üm ne richtige un zweckmäßige Kombination von Pausenhof, Appell- un Sportplatz tau gestalten. Hei het ’t nich schafft! Jimmy wür dunn an ein anner Schaul verset’t un müßt dat Projekt fallenlaten. As wi up ein’t von unse Klassendräpen (dat wier dat fiefuntwindigste, also 1981) uns’ olle Oberschaul in de Lessingstraat besichtigten, sehgen wi Jimmys unvollendetes Wark.

Weil wi em giern müchten un hei ümmer’n Uhr un’n gauden Rat för uns har, hemm’ wi Jimmy un siene Familie eis düchtig unner de Arm gräpen: Wi harn dat rutkrägen, dat hei im Vogelviertel ne AWG-Wohnung buugen wull. Also sünd wi eines Sünndachs mit uns’ ganze Trainingsgrupp anrückt un hemm’ poor AWG-Stunn afschrubbt. Wi wiern mindestens tein Mann, dor har hei also mit ein’ Schlag‘n ganzen Hümpel Stunn wech. Ne schöne Hülp, dei Gretchen un ick spärer bi uns’ 750 AWG-Stunn uk giern hat harn! Jedenfalls wohnt Jimmy hüt noch door, ick heff em nämlich 1982 besöcht, üm em unse Klassenchronik antaupriesen (ick heff se em tau’n Bekieken bröcht). Hei het sich bannich freut ! Dat wier richtich eigenorich antauseihn, as mien ehemaliger Lihrer un “Sportfründ” statt mit sien eigen Kinner schon mit’n Enkelkind up’n Arm vör mi stünn. So wier jedenfalls mien ierster Indruck damals. Naher heff ick mi oewerlecht, dat wi ja sülbst schon Omas un Opas in unse Reigen hemm. Jimmy künn gaut un giern schon Uropa sien, dat Öller het hei bald dortau.

Vorstehender Text ist ein Auszug aus der “Chronik eines Kollektivs”, erschienen zum 30. Klassentreffen 1986 in Neubrandenburg.